Helo bawb,
Rydym yn edrych ymlaen at GovCamp Cymru ar 6 Tachwedd yng Nghaerdydd — cyfle i rannu syniadau, cwrdd ag eraill sy’n poeni am wasanaethau cyhoeddus a thrafod sut i’w gwella. Gobeithio eich gweld yno!
Ailfeddwl trawsnewid digidol yn GIG Cymru
Mae Dafydd Vaughan o’n tîm yn myfyrio ar ganfyddiadau Archwilio Cymru am ddarpariaeth ddigidol ar draws GIG Cymru a’r hyn sydd angen newid. Mae’n dadlau bod angen mwy na phrynu technoleg newydd i wella gofal iechyd: mae angen atebolrwydd clir, cyllid parhaus i dimau amlddisgyblaethol a gwasanaethau wedi’u dylunio gyda chleifion a chlinigwyr. Wrth i Lywodraeth Cymru ddatblygu strategaeth ddigidol newydd, mae’n cynnig pum newid i droi uchelgais yn ofal gwell.
Partneriad gyda TransformGov Talks
Rydym wedi ffurfio partneriaeth swyddogol â TransformGov Talks i ddod â mwy o ddigwyddiadau i Gymru. Bydd y rhain yn rhoi cyfle i bobl rannu eu gwaith, dysgu oddi wrth ei gilydd a thrafod sut i greu gwasanaethau cyhoeddus gwell.
Daeth ein digwyddiad cyntaf yn The Bike Lock yng Nghaerdydd â thimau o Awdurdod Cyllid Cymru, y Gwasanaeth Adnoddau a Rennir a Transform Wales ynghyd. Buont yn rhannu gwersi ymarferol am ddylunio gwasanaethau o amgylch anghenion pobl a chreu’r amodau ar gyfer newid.
Gwyliwch recordiad ein digwyddiad cyntaf
Dewch i’n digwyddiad nesaf
Ymunwch â ni nesaf am 6pm ar 18 Tachwedd yn swyddfeydd Yolk yng Nghaerdydd i glywed gan dri siaradwr gwych:
- Rachel Meese, Pennaeth Dylunio sy’n Canolbwyntio ar Ddefnyddwyr yn Iechyd a Gofal Digidol Cymru
- Andy Regan, Pennaeth Nesta Cymru
- Omar Idris, Pennaeth Dylunio yn Perago
Bydd pizza ar gael i’r rhai sy’n ymuno â ni wyneb yn wyneb, neu gallwch wylio’r darllediad byw ar-lein.
Newyddion digidol y mis yng Nghymru
Siapio dyfodol ein hasesiadau sgiliau a gallu trwy brofi defnyddwyr
Mae Sarah Floyd o Wasanaethau Cyhoeddus Digidol Cymru yn rhannu canfyddiadau profion ar asesiad sy’n helpu timau gwasanaethau cyhoeddus i ddeall a datblygu eu sgiliau. Roedd cyfranogwyr eisiau iaith gliriach, mwy o dryloywder ynghylch defnyddio data ac argymhellion mwy ymarferol. Bydd y canfyddiadau’n llywio’r fersiwn nesaf, ac mae’r tîm yn gwahodd pobl i helpu i’w ddatblygu.
Pam mae arweinwyr yn sector cyhoeddus Cymru yn dal i drafod y pethau sylfaenol fel dyheadau?
Mae Nia Campbell o’n tîm yn gofyn pam mae arferion dylunio sy’n canolbwyntio ar ddefnyddwyr yn dal i gael eu trafod fel uchelgeisiau ar gyfer y dyfodol yng Nghymru. Mae’n archwilio’r bwlch rhwng sgyrsiau arweinwyr a phrofiadau ymarferwyr, ac yn herio arweinwyr i ystyried a yw eu sefydliadau’n rhoi’r gefnogaeth, y dylanwad a’r cyfleoedd gyrfa sydd eu hangen ar ymarferwyr i wella gwasanaethau cyhoeddus.
Yr hyn rydym yn ei ddysgu am gofnodi achosion: nid y cofnod yn unig sy’n bwysig
Mae Eliza Tyrrell o Ofal Cymdeithasol Cymru yn rhannu canfyddiadau cynnar ymchwil i gofnodi achosion. Mae’r gwaith yn archwilio sut mae diwylliant sefydliadol, goruchwyliaeth a hyder mewn barn broffesiynol yn effeithio ar yr hyn mae ymarferwyr yn ei gofnodi a pha mor ddefnyddiol ydyw. Mae’r tîm yn gwahodd pobl ar draws gofal cymdeithasol i rannu eu profiadau a helpu i brofi’r canfyddiadau hyn.
Nid strategaeth newid yw dweud ‘Byddwch yn feiddgar’
Mae Adrián Ortega yn archwilio pam nad yw gofyn i bobl weithio’n wahanol yn cyflawni llawer os yw rhwystrau sefydliadol yn aros yn eu lle. Mae’n ystyried sut mae llywodraethu, cyllido a gwneud penderfyniadau yn siapio ymddygiad, ac yn herio arweinwyr i ddileu prosesau diangen, ailystyried pwy sydd â’r awdurdod i weithredu a chreu’r amodau i dimau wella gwasanaethau cyhoeddus.
Pam ein bod yn ehangu’r cynllun peilot ‘Mynediad awdurdodedig’ cyn ei gyflwyno’n ehangach
Mae tîm Ap GIG Cymru yn esbonio’r hyn mae’n ei ddysgu o gynllun peilot sy’n caniatáu i aelodau teulu neu ofalwyr dibynadwy gael mynediad at gyfrif rhywun arall. Mae heriau ymarferol o ran cofrestru, gwirio hunaniaeth a chydsyniad wedi amlygu gwelliannau sydd eu hangen cyn cyflwyno’r gwasanaeth yn ehangach. Bydd y cam nesaf yn archwilio sut i hwyluso’r broses i bawb, gan gadw’r mesurau diogelu.
Cyfoeth Naturiol Cymru: nodiadau wythnosol, 16 Hydref
Mae tîm digidol Cyfoeth Naturiol Cymru yn rhannu diweddariadau ar drwyddedu adar, gwella’r fewnrwyd a’i system ddylunio. Mae’r nodiadau’n dangos sut mae’r tîm yn defnyddio ymchwil i ddeall anghenion pobl, yn ei gwneud yn haws dod o hyd i wybodaeth ac yn egluro sut mae timau cynnyrch yn gweithio gyda grwpiau llywodraethu. Cipolwg defnyddiol ar y gwaith beunyddiol o wella gwasanaethau cyhoeddus.
Nodiadau wythnosol: 23 Hydref
Mae Monika Swiatek o Iechyd Cyhoeddus Cymru yn rhannu cynnydd ar ddefnyddio dylunio gwasanaethau i wella gwasanaethau rheoli pwysau. Mae’n trafod sut gall gweithio’n agored a chofnodi penderfyniadau helpu timau i gydweithio, a pham mae angen dealltwriaeth gyffredin o dystiolaeth ar dimau iechyd a dylunio. Mae hefyd yn myfyrio ar y baich mae gwasanaethau tameidiog yn ei roi ar bobl sy’n gorfod ailadrodd eu hanes meddygol.
Digwyddiadau i ddod
Bywydau Digidol — 4 Tachwedd, Cyffordd Llandudno; 11 Tachwedd, Abertawe
Bydd cynhadledd flynyddol Anabledd Dysgu Cymru yn archwilio sut gall gwasanaethau digidol gefnogi dewis, annibyniaeth a chynhwysiant i bobl ag anabledd dysgu.
Design Swansea — 12 Tachwedd, 6.30pm, Urban HQ
Noson am ddim gyda Georgia Griffiths a Lucy Beddall yn trafod creadigrwydd, dosbarth cymdeithasol, dilyn eich trywydd eich hun a thynnu sylw at eich gwaith.